Futzal, basketbol we woleýbol boýunça Türkmenistanyň Talyplar ligalaryna badalga berildi
Türkmen döwlet bedenterbiýe we sport institutynda futzal, basketbol hem-de woleýbol boýunça Türkmenistanyň Talyplar ligalarynyň açylyş dabarasy geçirildi.
Bu çäre Türkmenistanyň Bedenterbiýe we sport baradaky döwlet komiteti bilen Türkmenistanyň Bilim ministrliginiň bilelikde tassyklan Türkmenistanyň Milli talyplar sport federasiýasynyň 2026-njy ýyl üçin köpçülikleýin sport we medeni çäreleriniň meýilnamasy esasynda guraldy. Meýilnama «Garaşsyz, baky Bitarap Türkmenistan – bedew batly at-myradyň mekany» ýylynyň çäklerinde amala aşyrylýar.
Açylyş dabarasynda çykyş edenler ýurdumyzda bedenterbiýäni we sporty ösdürmek, ýaş nesli sagdyn ruhda terbiýelemek hem-de ýokary netijeli sporty goldamak ugrunda alnyp barylýan giň gerimli işleriň ähmiýetini bellediler. Şeýle hem, milli sport hereketiniň yzygiderli ösdürilýändigi we talyplaryň sport işjeňligine giňden çekilýändigi aýratyn nygtaldy.
Dabaranyň çäginde institutyň «Sagdyn nesiller» çeper höwesjeňler toparynyň aýdym-sazly çykyşlary ýaýbaňlandyryldy. Çykyşlarda sagdyn durmuş ýörelgesiniň, sportuň we ruhubelentligiň waspy ýetirildi.
Türkmenistanyň Talyplar ligalarynyň açylmagy ýaşlaryň sporta bolan gyzyklanmasyny artdyrmaga, talyplaryň arasynda bäsdeşlige ukyplylygy güýçlendirmäge hem-de ýurdumyzyň sport abraýyny has-da belende galdyrmaga gönükdirilendir.
Arslan MYRADOW,
Türkmen döwlet bedenterbiýe we sport institutynyň
Ylym bölüminiň hünärmeni.
