Sambo boýunça Aziýa çempionaty
2-nji iýunda Liwanyň Juniýa şäherinde başlanan sambo boýunça Aziýa çempionatyna Türkmenistandan 27 türgen gatnaşdy.
Liwanyň Juniýa şäherinde badalga alan Aziýa çempionatynda türkmen türgenleri dürli derejeli medallaryň bäşisini gazandylar. Ýaryşlaryň birinji gününiň netijeleri boýunça biziň toparymyz bir altyn hem-de kümüş we bürünç medallaryň hersinden ikisine mynasyp boldular.
18 ýaşdan uly bolmadyk ýetginjekleriň arasynda geçirilen ýaryşda iň ýokary derejeli baýragy Rustam Annamuhammedow eýeledi. Ol bu üstünligi 98 kilogram çenli agram derejesinde gazandy, şunda medallar ugrunda türgenleriň üçüsi göreşdiler. Bijäniň şowly bolmagy netijesinde, Rustam dessine finala düşdi, şonda geçen deň tutluşykda (0:0) tehniki hereketleriň hasabyna eminler ýeňşi biziň samboçymyza berdiler.
Türkmenistanyň toparyna kümüş medallaryň ikisini söweş sambosynda Weronika Rus hem-de Sabina Agajanowa getirdiler. Olaryň ilkinjisi bary-ýogy iki türgeniň gatnaşmagynda 54 kilogram çenli agram derejesinde göreşdi. Şoňa görä-de, bu agramda ýeke-täk duşuşyk final tapgyry boldy, şonda berlen utuklar (3:2) boýunça Gazagystandan Aýna Satkynalyýewa ýeňil bolmadyk ýeňiş gazandy.
Sabina Agajanowa 80 kilogramdan ýokary iň agyr agram derejesinde çykyş etdi, bu ýaryşda Aziýanyň çempiony derejesine eýe bolmak ugrunda zenan türgenleriň üçüsi göreşdi. Bijäniň kesgitleýişi ýaly, Sabina dessine finala düşdi, emma ol ýerde Gazagystandan Anar Seýtimowadan asgyn geldi - 2:6 hem-de kümüş medala mynasyp boldy.
Ýetginjekleriň Aziýa çempionatynda bürünç baýraklara Seýdulla Akmamedow, söweş sambosynda bolsa Angelina Filippowa mynasyp boldular. Bu üstünligi Seýdulla 6 samboçynyň bäsdeşliginde geçirilen 64 kilogram-a çenli agram derejesinde gazandy. S.Akmamedow ýarym finalda çykyş eden ilkinji tutluşygynda Gyrgyzystandan Munarbek Baktiardan asgyn geldi – 0:1, bürünç medal ugrundaky göreşde bolsa, Yrakdan gelen Ridha Al-Garuhdan ynamly üstün çykdy – 6:0.
Angelina Filippowa bolsa, türgenleriň dördüsiniň gatnaşmagynda 59 kilograma çenli agram derejesinde çykyş edip, özüniň ilkinji tutluşygynda ýarym finalda Gazagystandan Žanel Nabiýewadan ýeňildi – 1:3 we bürünç medala mynasyp boldy.
74 kilograma çenli agram derejesinde Begenç Baltaýew, 50 kilogramda Dinara Iwadullaýewa we 72 kilogramda Rano Uzakowa sport sambosy boýunça kümüş medallaryň eýeleri boldular.
Türkmen samboçylarynyň bürünç medallaryny bolsa Dinara Hallyýewa (65 kilograma çenli), Faride Mämmedowa (80 kilograma çenli), Maksuda Egemberdiýewa (80 kilogramdan ýokary), Muhammet Babekow (58 kilograma çenli), Muhammet Kössekow (64 kilograma çenli), Kakageldi Ýegenbaýew (71 kilograma çenli) we Nedir Allaberdiýew (88 kilograma çenli) dagylar gazandylar.
Şeýlelikde, Liwanda geçirilen Aziýanyň çempionatynda türkmen türgenleri 22 medal gazandylar. Olaryň 3-si altyn, 5-si kümüş, 14-si bolsa bürünç medallardyr. Şol sanda türgenlerimiz üç günläp dowam eden ýaryşyň ilkinji gününde 5, ikinji gününde-de 5, üçünji gününde bolsa 12 medal gazandylar.
Yklym ýaryşyna 16 döwletden 260 türgeniň gatnaşandygyny ýatladýarys.
